من طرف عيالي أعداء النوم الاوائل ..يكرهوا النوم كره العمى ..ممكن تخلعلهم عين من عنيهم وبرضه يبقا أهون عليهم من النوم
لو أأقولهم خشوا ناموا بيعتبروها إهانة وشتيمة في حقهم ..مش عارفة إذا كانوا فعلا بيخافوا يناموا ولا إيه؟..بس أنا متأكده إنه حتى لو طلعلهم عفريت مارد ..
العفريت هايلطم على وشه ويلعن اليوم اللي طلعلهم فيه ويحلف بأيام القمقم اللي كان محبوس فيه إنها كانت احلى أيام شافها في حياته
باسمع باهباهات كتير بيقولوا إن الواد شوف ازاي نام على روحه يلا نشيله ندخله سريره ..وبعدين أبوه وأمه يبصواله بتشش(مصمصة يعني)ياسلام نايم زي الملايكة
..ههاهاهاههاهاهاهاهاهاهاهاهاهاهاهاهاهاهيي
أنا عيالي منذ نعومة اظافرهم عمرهم ماناموا على روحهم وحتى لما بيناموا بعد كل خناقة مابيبقاش شكلهم زي الملايكة مش عارفة ليه رغم إن سنهم صغير
بيناموا مفتحين عين ومغمضين التانية
ورنيم بالذات مابتبطلش كلام وهيا صاحية بس المفاجاءة ليكم إنها مابتبطلش كلام وهيا نايمة كمان ..اه والله
طول الليل اسمعها شوية تصرخ وشوية تضحك وبعدين تزعأ وبعدين تشتم عمرو وتصوت وتنادي مااااااماااااااااا
وبعدين تغني أغانيها الشهيرة زي يتربى في عزو حمادة عزو وزى الساعة في إيدك كام؟ياعمو الساعة كام؟ كل ده أثناء النوم
وعمرو اللي هوا حته من فشتي وطحالي وتوأم الروح والمعاميع بينام برضه مفتح عينيه الاتنين نص نص بس عمرو مابيتكلمش وهوا نايم
عمرو بيضرب شألباظات وبلانصات وشلاليت وهوا في عز نومه وساعات كتيير أبص عليه ألاقيه في وضع السجود بتاع الصلاة
مش عارفة ليه؟
حتى المفعوصة الذؤوبه الشبر ونص .<صاحبة 10 شهور عمر>.. لمى بقت نسخة كربونية منهم أحطها في سريرها تقوم تقف أدكها زي لبيسة القلم الجاف
تظط لفوق تاني أفألسها على بطنها تلف على ضهرها أغطي فيها وأكتم وشها تشيل الغطا وتقوم تظط في السرير وتمسك في جداره وتقف تتفرج وهيا مدلدلة راسها
زي اللي بيتفرج من البلكونة ساعات أأقرب وأبص عليهم وهما نايمين باخاف من أشكالهم وهما نايمين وماباعرفش إذا كانوا صاحيين ولا رايحين في النوم ..وأخاف لاأصحى من الحلم الجميل ده
عارفين يا إن كل يوم الصبح عمرو يقوم يفتح عينيه الصبح بدري جدا يكتشف إن في خيانه حصلت.. وإنه نام ..فيبص على الساعة وهوا بدأ
يفهم فيها وبعدين يشهأ من المفاجآة ويقوم يجري يصحي أخته ويقولها قومي قومي إلحقي الساعة 8 قومي ..رنييم تقوم جري وتقوله ياسلام قول والله
إهئ إهئ ..بيصعب عليهم يناموا ..ممكن يناموا بالليل الساعة 2 مثلا وتلاقيهم صاحيين الصبح بدري كلهم حيوية ونشاط غريب مش قادرة أفهمه
نفسي نفسي ياربي المعجزة دي كانت تحصل يعني هوا كتير عليا..ده أنا كنت اعمل ليله للأطفال الغلابة
أوزع فيها بلالين ونفافيخ وطراطير وزمامير
بس المعجزة حصلت من كام يوم والله حصل ..بدأت ألاحظ إنتظامهم في النوم يعني مش معقول ممكن الحلم اتحقق
رنيم بقت بتنام على روحها وهيا قاعدة بتتفرج على التلفزيون وعمرو يتدألج وراها ويروح في النوم
وساعات يطلبوا النوم بنفسهم ..ياربي عمرها ماحصلت ايه اللي جرى في الدنيا
بس رغم سعادتي إن أنا بقيت شبه أمهات كتيير عيالهم بيناموا برضه حاسه بخيانة أو حركة غدر يكونوش متفقين عليا وعاملين مقلب
فات كام يوم بالشكل ده والنوم زاد ..الله يمكن من شقاوتهم
المهم في يوم الصبحية كنت في المطبخ ..شغالة بكل حماس أحضر فطار العيال وأكل لمى سمعت دوشة جاية من أودة العيال روحت أحّجّز بينهم وأقصر الشر قبل مالخناقة تطوروتبقا فيها دم
باقرب شوية بشوية سمعت همس بينهم
رنييم:لأ إنت خلصتها وأخدت كتير
عمرو :أنا والله ماخدتث غير ثفته واحدة بث
رنييم:أنا لسه ماشربتش ولا مرة
عمرو :ماما هاتثمعنا وتجي تضربنا ..هاتي ثوية صغيرين
أنا قلت ياربي هما بيتخانقوا على إيه..بابص من ورا الباب لقيت رنييم مخبية ورا ضهرها حاجة مش شايفاها
رنييم :طيب خد شوية بس إوعى تخلصها عمرو :ماثي
بابص لقيت رنييم بتديلة إزازة ..الله إزازة ايه دي..وبعدين قلت بصوت عالي هجوووووووووووووووووم
باقوله انت يابني بتأربع في إيه ؟ وريني كده ...أن أن أن آآآآآآآآآآآآآآآآآآآآه
آآآآآآآآآآه على اللي شفته ...عيالي المليانين براءة مدمنين..بيتعاطوا دوا كحة (سعال)...بيأربعوا فيه ويبلبعوا من ورايا
يالهويييييييييييييييييييييييييييييييييييييييييييييييي يانهاركم ملحوس ومتعاص جلة ...بتتعاطوا إيه؟ أدوية كحة
ياخراااااااااااااابي .. ياولاد المجانين دوا الكحة ..بقيتوا مدمنين أدوية كحة
الإزازة من الحجم الكبير بطعم البرتقال ..عجبتهم موت..عمرو طبعاً فتن على أخته وقالي إن رنييم من ورايابتدخل المطبخ تفتح التلاجة وتأربع
قالتلي ياماما مش أنا بس ده عمرو والله كمان بيحبه وبيشرب منه علطول من زمان ..
خدي منه ياماما ده حلو والله مابيعملش وجع وإبقي خلي بابا يجيب منه علطول واحد ليا وواحد لعمرو
قلتلها بتشربي الدوا من الإزازة زي الشوربة ...أتاري العيال بيناموا ولما بيكونوا صاحيين يبقوا مفرفشين وآخر ونونة وسلطنة
زي المدمنين بالظبط عمالين يضحكوا عمال على بطال
...وأنا مش فاهمة إيه اللي بيحصل ..ونومهم زاد وبقا أخر تمامإهئ إهئ إهئ إهئ
..فلذات أكبابي مدمنين وهما 7 و 4 سنين ..آمال كمان 5 سنين هايتعاطوا إيه ..هايحرقوا النمل و الصراصير ويشموهم ..ويشتروا البنزين زي أطفال الشواaرع ويشموا فيه ..وجايز الجرعات دي ماعادتش تكفيهم وتكفي مزاجهم يفكروا
يطحنوا الجماجم ويتعاطوها ..ياخوفي لاتكون أول جمجمة بتعاتي أنا
يارب ألطف بيا ..أنا حاسة إن مش هايجرالي طيب
حطيت صوابعي العشرة في الشق منهم ..حسبي الله ونعم الوكيل
